कात्तिक १६ देखि माघ १५ सम्म ६ घण्टे कार्यालय समय लागू, शुक्रबार पुरानै समय कायम
काठमाडौँ । आजदेखि नेपालभरका सरकारी कार्यालयहरूको सेवा समय घटेको छ। सरकारले चालू आर्थिक वर्षका लागि तय गरेको नयाँ समय तालिकाअनुसार कात्तिक १६ गतेदेखि माघ १५ गतेसम्म सरकारी कार्यालयहरू बिहान १० बजेदेखि दिउँसो ४ बजेसम्म मात्र सञ्चालन हुने भएका छन्।
यसअघि दिउँसो ५ बजेसम्म सेवा दिने कार्यालयहरूले अब ६ घण्टा मात्र सेवा प्रदान गर्नेछन्। सरकारले चाडपर्व र मौसमजन्य कारणलाई ध्यानमा राखेर हिउँदे अवधिका लागि कार्यालय समय घटाएको बताइएको छ।
शुक्रबार भने पुरानै व्यवस्था जस्तै दिउँसो ३ बजेसम्म मात्र कार्यालय खुल्नेछ।
नयाँ कार्यसूची लागू भएसँगै सेवाग्राहीहरूलाई आवश्यक काम समयमै मिलाउन पूर्व योजना बनाएर कार्यालय धाउनु पर्ने भएको छ। सरकारले तोकेको यो समय माघ १५ गतेपछि पुनः पुरानै तालिकामा फर्कनेछ।