नेपाल राष्ट्र बैंकले २५ करोडको सेयर कर्जा सीमा हटाउँदै पूँजी बजार सुधार सुझाव कार्यान्वयनमा अघि बढ्यो
.jpg)
काठमाडौं । नेपाल राष्ट्र बैंकले बैंक तथा वित्तीय संस्थाहरूलाई व्यक्तिलाई दिन सकिने सेयर कर्जाको सीमा हटाउने निर्णय गरेको छ। यसअघि लागू गरिएको २५ करोड रुपैयाँको सीमा अबबाट हटाइएसँगै पूँजी बजारमा तरलता र लगानी प्रवाह सहज हुने अपेक्षा गरिएको छ।
राष्ट्र बैंकले यो निर्णय पूँजी बजार सुधार सुझाव कार्यदलका सिफारिसअनुसार गरेको हो। सो कार्यदल अर्थमन्त्री रामेश्वर खनालको नेतृत्वमा गठन गरिएको थियो।
यससँगै बैंकहरूले सेयर खरिद–बिक्रीमा पनि नयाँ सहजता पाएका छन्।
पहिले सेयर खरिद गरेको एक वर्षपछि मात्र प्राथमिक पूँजीको २० प्रतिशत रकमसम्म लगानी बिक्री गर्न पाउने व्यवस्था थियो। यो सीमा अब हटाइएपछि बैंकहरूले लगानी बिक्रीमा लचिलो नीति अपनाउन पाउने भएका छन्।
त्यस्तै, सूचीभूत भइसकेका संगठित संस्थाका सेयर तथा डिबेञ्चरमा बैंकहरूले ६ महिनाभन्दा बढी अवधिको लागि लगानी गर्न पाउने भएका छन्। यसअघि यो अवधि कम्तीमा १ वर्ष तोकिएको थियो।
आर्थिक विश्लेषकहरूका अनुसार, यस कदमले पूँजी बजारमा लगानीकर्ता र वित्तीय संस्थाको गतिविधि बढ्नेछ, जसले बजारलाई थप चलायमान बनाउनेछ।
