मोरङबाट सिमाना हेरफेरको प्रस्ताव अघि, मन्त्रालयले देशभरबाट सुझाव संकलन सुरु
.png "nagar ko khabar")
कानेपोखरी —
संघीय मामिला तथा सामान्य प्रशासन मन्त्रालयले स्थानीय तहको संख्या तथा सिमाना पुनःसंरचनाका लागि सरोकारवाला निकायहरूसँग सुझाव माग गर्दै प्रक्रिया अघि बढाएको छ। मन्त्रालयले देशभरका स्थानीय तहबाट धारणा संकलन सुरु गरेको जनाएको छ।
यसैबीच, मोरङ जिल्लाबाट लेटाङ नगरपालिका, कानेपोखरी गाउँपालिका र मिक्लाजुङ गाउँपालिकाका केही वडाहरूलाई समेट्ने गरी नयाँ प्रस्ताव अघि आएको छ। स्रोतका अनुसार लेटाङ नगरपालिकासँग जोडिएका कानेपोखरीका उत्तरी वडाहरू तथा मिक्लाजुङका पश्चिमी वडाहरूलाई समावेश गर्दै सिमाना पुनःसंरचना गर्ने तयारी गरिएको छ।
उक्त प्रस्तावले स्थानीय तह पुनःसंरचनाको विषयमा नयाँ बहस सुरु गराएको छ। मन्त्रालयले वैशाख ३ गते सम्बन्धित निकायहरूलाई पत्राचार गर्दै गाउँपालिका, नगरपालिका र वडाको संख्या तथा सिमाना हेरफेरसम्बन्धी सुझाव पेश गर्न आग्रह गरेको थियो। त्यसपछि विभिन्न स्थानबाट यस्ता प्रस्तावहरू आउन थालेका छन्।
स्थानीय सरकार सञ्चालन ऐन, २०७४ अनुसार सिमाना परिवर्तन, स्थानीय तह गाभ्ने तथा वडाको संख्या समायोजन गर्ने प्रक्रिया अघि बढाइएको मन्त्रालयले जनाएको छ।
यदि लेटाङ–कानेपोखरी–मिक्लाजुङ क्षेत्रलाई समेट्ने प्रस्ताव कार्यान्वयनमा आयो भने सेवा प्रवाह सहज हुने, भौगोलिक समन्वय सुदृढ हुने र प्रशासनिक दक्षता बढ्ने अपेक्षा गरिएको छ।
मन्त्रालयले प्राप्त सुझावहरूको अध्ययन गरी आवश्यक निर्णय लिने जनाएको छ।