रंगेली नगरपालिकाको ९६ करोडको बजेट सार्वजनिक, कृषि, शिक्षा र स्वास्थ्यलाई प्राथमिकता

चालु खर्च, पूँजीगत योजना, र सामाजिक सुरक्षा भत्तासहितको बजेटमा अधुरा योजना सम्पन्न गर्न र सेवा सुधारमा जोड

रंगेली नगरपालिकाले आर्थिक वर्ष २०८२/०८३ का लागि ९६ करोड ४० लाख रुपैयाँको बजेट सार्वजनिक गरेको छ। नगर प्रमुख दिलिप बगडीयाको अध्यक्षतामा सम्पन्न बाह्रौं नगरसभाबाट सर्वसम्मत रूपमा पारित बजेटमा कृषि, शिक्षा र स्वास्थ्य क्षेत्रलाई विशेष प्राथमिकता दिइएको छ।

नगरपालिकाका उपप्रमुख भूमा पराजुलीले नीति, कार्यक्रम तथा आय–व्यय विवरण प्रस्तुत गर्दै चालु खर्चतर्फ ४८ करोड ८१ लाख, पूँजीगततर्फ २४ करोड ५९ लाख, र सामाजिक सुरक्षा भत्तातर्फ २३ करोड रुपैयाँ विनियोजन गरिएको जानकारी दिनुभयो।

मुख्य बजेट विनियोजन क्षेत्रगत रूपमा यस्तो छ:

• आर्थिक विकास: ४ करोड १६ लाख

• सामाजिक विकास: १२ करोड २ लाख

• पूर्वाधार विकास: २२ करोड १ लाख

• उद्योग प्रवर्द्धन: २८ लाख

• सूचना प्रविधि तथा सञ्चार: ९७ लाख ५० हजार

• सुशासन तथा अन्तरसम्बन्ध: ७२ लाख

• विपद् व्यवस्थापन: ७० लाख

• प्रशासनिक खर्च: ३१ करोड ७ लाख

• अन्य क्षेत्र: १ करोड ४५ लाख

• सामाजिक सुरक्षा भत्ता: २३ करोड

बजेटका प्राथमिक क्षेत्रहरू:

चालु खर्चमा रंगेली अस्पतालको व्यवस्थापन, सिँचाइ मिटरको बिल, सडक बत्ती, निःशुल्क बीमा, र महिला स्वास्थ्य स्वयंसेविका, शिक्षक तथा स्वास्थ्यकर्मीको पारिश्रमिक समावेश गरिएको छ।

मेयर बगडीयाको भनाइ:

नगरसभा समापनमा नगर प्रमुख बगडीयाले भन्नुभयो,

“पुराना बहुवर्षीय योजना सम्पन्न गर्न र आधारभूत सेवा सुधार गर्न बजेट केन्द्रित गरिएको छ। कुनै योजना कागजमै सीमित नरहोस् भन्ने हाम्रो प्रयास हो।”

नगरसभाको अवसरमा उत्कृष्ट कार्य सम्पादन गर्ने शिक्षक, कर्मचारी र सञ्चारकर्मीहरूलाई सम्मान समेत प्रदान गरिएको थियो।