जेन-जी आन्दोलनका बीच फेसबुक स्टाटसमार्फत भड्काएको आरोप, कांग्रेस नेताहरूले तत्काल रिहाइको माग
२४ भदौको जेन-जी आन्दोलनका क्रममा पर्वतमा निजी तथा सरकारी संरचना जलाइँदै गर्दा सामाजिक सञ्जालमा स्टाटस लेखेर आन्दोलनलाई थप भड्काएको आरोपमा पर्वत फलेवास नगरपालिका–४ का वडाध्यक्ष अच्युत तिवारीलाई प्रहरीले पक्राउ गरेको छ।
प्रहरीका अनुसार तिवारीले आन्दोलनकै बीचमा पर्वतका बालुवा तस्कर, तिनका संरक्षक तथा प्रहरी प्रशासनमाथि प्रश्न उठाउँदै फेसबुकमा स्टाटस लेखेका थिए। सोही स्टाटसमा उनले पर्वत प्रहरी प्रमुख डीएसपी रविन विष्टलाई समेत आलोचना गरेका थिए। प्रहरीले यही स्टाटसलाई आधार बनाएर उनलाई विद्युतीय कारोबार ऐन २०६३ को दफा ४७ अन्तर्गत साइबर अपराध मुद्दा दर्ता गरेको हो।
“देशभर सरकारी संरचना जलाईरहेका थिए, पर्वतमा पनि आन्दोलनले उग्र रूप लिँदै गर्दा वडाध्यक्षबाटै भड्काउने काम भएपछि पक्राउ गरी कारबाही अगाडि बढाइएको हो,” पर्वत प्रहरी प्रमुख डीएसपी विष्टले जानकारी दिए। उनका अनुसार अनुसन्धानका लागि तिवारीको म्याद थप प्रक्रिया सुरु भइसकेको छ।
तर, कांग्रेसका स्थानीय तथा केन्द्रीय नेताहरूले भने तिवारीलाई प्रतिशोधपूर्वक पक्राउ गरिएको दाबी गरेका छन्। उनीहरूको भनाइमा, “स्टाटस लेखेकै कारण पक्राउ गर्नु अभिव्यक्ति स्वतन्त्रतामाथि प्रहार हो,” भन्दै तत्काल रिहाइको माग गरिएको छ।
जेन-जी आन्दोलनका क्रममा पर्वतमा तीन प्रमुख दल — नेपाली कांग्रेस, नेकपा एमाले र नेकपा माओवादी केन्द्रका कार्यालयहरूमा आगजनी भएको छ। त्यस्तै, एमाले नेता तथा पूर्वमन्त्री पदम गिरीको घर जलेको छ भने कांग्रेस केन्द्रीय सदस्य अर्जुन जोशीको घरमा तोडफोड भएको छ।
प्रहरीका अनुसार आन्दोलनकै क्रममा पर्वत कारागार पनि तोडफोड भएको थियो। त्यहाँ रहेका ९३ कैदीमध्ये १९ जना भाग्न सफल भए पनि हालसम्म ९ जना पुनः पक्राउ परेका छन् र बाँकीलाई नियन्त्रणमा लिन थप टोली परिचालन गरिएको छ।
यसैबीच, प्रहरीले तोडफोडमा संलग्नहरूको फोटो तथा भिडियो सार्वजनिक गर्न स्थानीयलाई आह्वान गरेको छ।