भारतको आन्ध्र प्रदेशमा यात्रु बसमा आगलागी, कम्तीमा २५ जनाको मृत्यु

कुर्नुल जिल्लामा मोटरसाइकलले पछाडिबाट ठोक्किँदा बसमा आगो, धेरै यात्रु जलेर मृत्यु — प्रधानमन्त्री मोदीको समवेदना

कात्तिक ७ ।दक्षिण भारतको आन्ध्र प्रदेश राज्यमा भएको भीषण बस दुर्घटनामा कम्तीमा २५ जनाको ज्यान गएको छ। शुक्रबार बिहान कुर्नुल जिल्लामा यात्रु बसमा आगलागी हुँदा उक्त घटना भएको भारतीय प्रहरीले जनाएको छ।

घटनाको क्रममा मोटरसाइकलले बसलाई पछाडिबाट ठोक्किँदा स्पार्क भएर बसको इन्धन ट्याङ्कीमा आगो लागेको बताइएको छ। तेलङ्गानाको हैदराबादबाट कर्नाटकको बेङ्गलुरु जाँदै गरेको उक्त यात्रु बसमा ४४ जना सवार थिए।

दुर्घटनापछि केही यात्रु झ्याल फुटाएर बाहिर निस्कन सफल भए पनि धेरै यात्रु समयमै बाहिर निस्कन नसक्दा जलेर मृत्यु भएको छ। प्रहरी अधिकारी विक्रान्त पाटिलका अनुसार चालकले आगो निभाउने प्रयास गरे पनि नियन्त्रण गर्न सकेनन्।

फरेन्सिक टोलीले घटनास्थलमा पुगेर अनुसन्धान सुरु गरेको छ। घटनामा मोटरसाइकल चालकको समेत मृत्यु भएको बताइएको छ।

प्रधानमन्त्री नरेन्द्र मोदी र आन्ध्र प्रदेशका पूर्वमुख्यमन्त्री एन. चन्द्रबाबु नायडूले मृतकका परिवारप्रति समवेदना प्रकट गर्दै पीडित परिवारलाई सहयोग गर्ने प्रतिवद्धता जनाएका छन्।

यो दुई साताभित्र भारतमा भएको दोस्रो घातक बस आगलागी हो। यसअघि राजस्थानमा यात्रु बसमा सर्ट सर्किटका कारण आगो लाग्दा कम्तीमा २० जनाको मृत्यु भएको थियो।

© Nagar Ko Khabar – 2025