जेनजी आन्दोलनमा उपकरण जलेपछि सेवा ठप्प, विभागले मर्मत र नयाँ मेसिन ल्याउने तयारी
.jpg)
काठमाडौं —यातायात व्यवस्था विभागले सवारी चालक अनुमतिपत्र (लाइसेन्स) नवीकरण र नयाँ आवेदन लिन छठ पर्वपछि मात्र सुरु गर्ने निर्णय गरेको छ।
जेनजी आन्दोलनका क्रममा विभागमा लाइसेन्स छाप्ने मेसिन र अन्य उपकरणमा आगजनी भएपछि सम्पूर्ण सेवा बन्द भएको थियो। उक्त क्षतिग्रस्त उपकरण मर्मत र नयाँ मेसिन खरिदको प्रक्रिया सुरु भएको विभागले जनाएको छ।
विभागका महानिर्देशक राजीव पोखरेलका अनुसार आगजनीका कारण लाइसेन्स छपाइ कार्य तत्काल सम्भव नभएकाले केही समयका लागि सेवा स्थगित गरिएको हो। उनका अनुसार, “हामीले नयाँ मेसिन र आवश्यक उपकरणको व्यवस्थापनको काम अघि बढाइरहेका छौं, छठपछि सेवा नियमित हुनेछ।”
विभागले हाल सञ्चालनमा रहेका आवेदन प्रणाली र डेटाबेस सुरक्षित रहेको बताएको छ। प्रयोगशाला, छपाइ कक्ष, र फोटो काउन्टरहरू मर्मतका क्रममा छन्।
सवारी चालक अनुमतिपत्रका नयाँ आवेदन दिन चाहने र नवीकरण गर्नुपर्ने सेवा उपभोक्ताले छठपछि मात्र आफ्नो प्रक्रिया अगाडि बढाउन पाउने छन्।
