सुरक्षा परिषद्को सिफारिसपछि आज सिंहदरबारमा बस्ने मन्त्रिपरिषद् बैठकले सेना परिचालन निर्णय गर्न सक्छ, हालको सुरक्षा चुनौती र प्रसाईं आन्दोलन मुख्य कारण
काठमाडौं — प्रतिनिधिसभा निर्वाचन नजिकिँदै गर्दा सुरक्षा व्यवस्थापन कडा बनाउन सरकारले नेपाली सेना परिचालन गर्ने तयारी गरेको छ। सोही विषयमा छलफल गर्न प्रधानमन्त्री तथा मन्त्रिपरिषद् कार्यालय सिंहदरबारमा आज दिउँसो २ बजे मन्त्रिपरिषद् बैठक बस्ने भएको छ।
यसअघि बिहीबार बसेको राष्ट्रिय सुरक्षा परिषद्को ४१औँ बैठकले संविधानको धारा २६६(१) बमोजिम निर्वाचनलाई सुरक्षित, शान्त र निष्पक्ष बनाउन सेना परिचालन गर्न मन्त्रिपरिषद्मा सिफारिस गर्ने निर्णय गरेको थियो।
मन्त्रिपरिषद् बैठक बिहीबार नबस्नुको कारण केन्द्रीय सुरक्षा समितिको बैठकसँग समय जुध्नु भएको बताइएको छ।
सरकारी स्रोतका अनुसार, सरकारले आगामी फागुन २१ गते हुने प्रतिनिधिसभा निर्वाचनलाई लक्षित गरी सुरक्षामा कडाइ गर्ने तयारी गरेको छ। तर पछिल्लो समय नागरिक बचाउ महाअभियानका संयोजक दुर्गा प्रसाईंले घोषणा गरेको आन्दोलनले सुरक्षामा थप चुनौती बनेपछि सरकारले सेना चाँडै फिल्डमा उतार्ने तयारी गरेको सरकारकै एक मन्त्रीले बताए।
पछिल्ला चुनावहरूमा सामान्यतया मतदान हुनु एक महिना बाँकी हुँदा मात्र सेना परिचालन गरिँदै आएको थियो। तर यसपटक जेनजी आन्दोलन र प्रसाईं समूहको गतिविधिले सुरक्षामा असामान्य दबाब सिर्जना भएको भन्दै सरकारले पहिल्यै सेना परिचालन गर्नुपर्ने निष्कर्ष निकालेको छ। प्रसाईं हाल प्रहरी हिरासतमा रहेका छन्।
भदौ २३ र २४ मा भएको जेनजी आन्दोलनपछि देशभरको सुरक्षा स्थिति पूर्ण रूपमा स्थिर हुन नसकेको सुरक्षासम्बन्धी निकायहरूको मूल्यांकन छ। विभिन्न दलहरूले समेत निर्वाचनको माहोल सुरक्षित नरहेको भन्दै सरकारलाई आलोचना गरिरहेका छन्।
गृहमन्त्रालयले सेना परिचालनका लागि तयार पारिएको ‘एकीकृत निर्वाचन सुरक्षा योजना ०८२’ रक्षा मन्त्रालयमार्फत सुरक्षा परिषद्मा पठाइसकेको छ। आजको मन्त्रिपरिषद् बैठकले उक्त सिफारिस अनुमोदन गर्ने सम्भावना निकै उच्च देखिएको छ।