सामाजिक सञ्जालमार्फत खेलाडीलाई आर्थिक प्रलोभन देखाइ परिणाम प्रभावित गर्न खोजेको आरोपमा दुई जना पक्राउ, घटना विशेष टोलीद्वारा छानबिनमा
काठमाडौं — दोस्रो संस्करणको नेपाल प्रिमियर लिग (एनपीएल) क्रिकेटमा सट्टाबाजी र ‘म्याच फिक्सिङ’ प्रयास गरेको आरोपमा प्रहरीले दुई जनालाई नियन्त्रणमा लिएको छ। पक्राउ पर्नेमा भारतको हरियाणा, पानीपतका २८ वर्षीय दिलप्रित सिंह र नेपालको बर्दिया घर भई हाल भारतको चण्डीगढमा बस्दै आएकी २४ वर्षीया रेविका सिंह ठकुरी छन्।
प्रहरीको विशेष टोलीले दुवै जनालाई मंसिर २ गते मंगलबार काठमाडौंको लाजिम्पाट क्षेत्रमा संचालन गरिएको अपरेशनमार्फत पक्राउ गरेको हो।
प्रहरीका अनुसार, उनीहरूले सामाजिक सञ्जाल—विशेषगरी ह्वाट्सएप र इन्स्टाग्राम—मार्फत एनपीएलमा सहभागी खेलाडीहरूसँग सम्पर्क गर्दै प्रायोजनको बहानामा नजिकिन्थे। प्रारम्भिक अनुसन्धानमा खेलाडीसँग आर्थिक प्रलोभन देखाई खेलको परिणाममा प्रभाव पार्ने प्रयास गरिएको पुष्टि भएको छ।
पक्राउ परेका दुवै जनालाई थप अनुसन्धान र कानुनी प्रक्रियाका लागि जिल्ला प्रहरी परिसर, भद्रकाली पठाइएको प्रहरीले जनाएको छ।