संयुक्त सुरक्षा टोलीले सडक किनार र जंगलभित्र लुकाइ–छिपाइ राखिएको अवस्थाबाट लागूऔषध बरामद, संलग्न व्यक्तिको खोजी जारी
३० कात्तिक — सुनसरीको धरान उप–महानगरपालिका–४ र १७ का दुई अलग–अलग स्थानबाट प्रहरीले गरी ३१७ किलोग्राम लागूऔषध गाँजा बेवारिसे अवस्थामा बरामद गरेको छ।
कोशी प्रदेश प्रहरी कार्यालय विराटनगरअन्तर्गतको प्रादेशिक अनुसन्धान समूह (PIT), इलाका प्रहरी कार्यालय धरान तथा इलाका प्रहरी कार्यालय भेडेटारबाट खटिएको संयुक्त टोलीले कात्तिक २८ गते धरान–४ स्थित कोशी लोकमार्गमा चेकजाँचका क्रममा सडक किनारमा छाडिएका को. ३० प ४५४४ र बा. ५१ प ५४१३ नम्बरका दुई मोटरसाइकलबाट ४९ किलो गाँजा फेला पारेको थियो।
त्यसैगरी, कात्तिक २९ गते विशेष सूचनाका आधारमा प्रादेशिक अनुसन्धान समूहबाट खटिएको अर्को टोलीले धरान–१७ स्थित जंगलभित्र बोरामा प्याक गरी लुकाएर राखिएको अवस्थामा थप २६८ किलो गाँजा फेला पारेको हो।
प्रहरीका अनुसार दुवै घटनामा संलग्न व्यक्तिहरूको पहिचान तथा खोजतलास जारी रहेको छ। बरामद भएका लागूऔषधलाई आवश्यक प्रक्रिया अनुसार नियन्त्रणमा लिइएको जनाइएको छ।