डेडिकेटेड र ट्रङ्क लाइनमार्फत वर्षौंदेखि भुक्तानी नदिएका उद्योगीले अब किस्ता तिर्न थालेपछि उर्जामन्त्री घिसिङले धन्यवाद व्यक्त
काठमाडौं — डेडिकेटेड तथा ट्रङ्क लाइनमार्फत विद्युत उपभोग गरी लामो समयदेखि भुक्तानी नगरेका अधिकांश उद्योगीहरूले तोकिएको प्रिमियम महसुलको बक्यौता रकममध्ये पहिलो किस्ता तिरेका छन्।
ऊर्जा, जलस्रोत तथा सिँचाइ मन्त्री कुलमान घिसिङका अनुसार सरकारले बक्यौता असुलीलाई प्राथमिकतामा राखेको र यस दिशामा ठोस प्रगति भएको हो। उनले भने,
“सबैको निरन्तर चासो, निगरानी र खबरदारीका कारण बक्यौता असुली अब ठोस परिणामतर्फ अगाडि बढेको छ। हालको आर्थिक परिस्थितिमा देशप्रतिको दायित्वबोधसाथ बक्यौता रकमको किस्ता तिर्न सुरु गर्नुभएका सम्पूर्ण उद्योगी साथीहरूलाई धन्यवाद दिन चाहन्छु।”
मन्त्री घिसिङले बक्यौता असुलीमा सहकार्य र समन्वयका लागि प्रधानमन्त्री, अर्थमन्त्री, उद्योग, वाणिज्य तथा आपूर्तिमन्त्री, नेपाल उद्योग वाणिज्य महासंघका पदाधिकारीहरूलगायत सबैप्रति आभार प्रकट गरेका छन्।
नेपाल विद्युत प्राधिकरणले बक्यौता असुलीलाई प्रभावकारी बनाउन आवश्यक कदमहरू अघि बढाइरहेको जनाएको छ। यससँगै उद्योगीहरूले आगामी चरणमा बाँकी रकम समयमै तिर्ने प्रतिबद्धता जनाएका छन्।