दुर्घटनामा घाइते मतदान अधिकृत डोरप्रसाद घिमिरेको उपचारका क्रममा मृत्यु, यसअघि एक प्रहरीको ज्यान गइसकेको थियो
रामेछापमा भएको सवारी दुर्घटनामा थप एक जनाको ज्यान गएको छ। निधन हुने व्यक्ति मतदान अधिकृतको रूपमा खटाइएका शिक्षक भएको पुष्टि भएको छ। यस घटनामा यसअघि नै एक प्रहरीको मृत्यु भइसकेको थियो।
दुर्घटनामा गम्भीर घाइते भएका मतदान अधिकृत डोरप्रसाद घिमिरेको मन्थली अस्पतालमा उपचारका क्रममा मृत्यु भएको प्रहरीले जनाएको छ। उनी प्रतिनिधिसभा निर्वाचनका लागि रामेछाप–२ अन्तर्गत साँघुटार (ख) मतदान केन्द्रमा मतदान अधिकृतको जिम्मेवारीमा खटाइएका थिए।
रामेछापका मुख्य निर्वाचन अधिकृत राजेन्द्र नेपालका अनुसार घिमिरे रामेछाप नगरपालिका–३ स्थित मुगाटारमा रहेको रुद्राक्षश्वर माध्यमिक विद्यालयमा अध्यापनरत शिक्षक थिए। उनी निम्न माध्यमिक तह द्वितीय श्रेणीका शिक्षक थिए।
यसै दुर्घटनामा यसअघि घटनास्थलमै प्रहरी सहायक निरीक्षक पर्शुराम यादवको मृत्यु भएको थियो। दुर्घटनाको कारणबारे थप अनुसन्धान भइरहेको प्रहरीले जनाएको छ।